保險公司唔肯為醫療界提供包括傳染病風險嘅勞保，俾人鬧到飛起，但保險業企硬，唔肯讓步。保險陳代表唔少業界聲音，佢對左丁山話：「國際間嘅大型『再保險公司』（Reinsurance）唔肯食餅仔，要我哋啃晒，我哋點啃得落，一啲比較細嘅公司，重死火啦。」保險公司慣晒分攤風險，我哋一投保，保險公司就向再保險公司投保，即使一單死火，賠錢嘅有好多人，唔會淨係一間本地保險公司，否則佢哋執咗好耐咯。外地嘅再保險公司覺得香港嘅勞保賠償準則太寬，任由法官點判，一個判少啲，另一個就可能判多啲，保險公司梗係照判多啲嘅個案來釐定保費，有乜辦法唔增加保費吖。
保險K日前去勞資審裁處聽一單案件，係有關佢哋公司要賠嘅。佢無意中聽到另外一單餐廳員工索償案，聽到佢唔知好嬲定好笑。話說沙士期間，唔少餐廳要求員工減薪，唔願意簽字嘅，就立即遣散，按勞工例賠償。好嘞，𠵱家生意好轉，一啲當時走咗嘅夥計就走去勞工處要求賠多啲，賠乜呢？就係賠貼士。夥計話餐廳只賠薪水好唔公道，因為佢哋每個月都有重大貼士收入，貼士係薪酬嘅一個主要部份，公司既然遣散佢哋，應該將貼士計入薪水先至計數！保險K聽完故事，認為唔知點賠，事關每個月嘅貼士收入，時高時低，老闆都未必知有幾多，點計數呀？於是走去請教一個餐廳老細。
（明續）