近年，豪華轎車市場競爭愈趨激烈，繼寶馬及平治車廠，為旗下嘅7系及S-Class推出新型號後，同樣來自德國嘅奧迪車廠，亦為旗下嘅A8車系推出新一代型號，並廣受好評；然而，廠方為吸引用家，最近更特別為A8加入一台6.0公升V12偈，以滿足不同用家需要。
呢部屬長陣版嘅A8L6.0Quattro型號，係配用咗一台全新嘅6.0公升V12引擎，馬力及扭力輸出數值分別係450匹及59.2kgm，相比起現有型號多出30匹馬力及2.0kgm扭力，響一套著名嘅6前速Tiptronic半自動波箱，同埋Quattro恒式四驅系統輔助下，新車0至100公里加速度僅為5.2秒，而極速更高達250km/h咁快㖭！
至於造型則與現有其他型號相近，但車頭鬼面罩兩旁除備有電鍍框邊外，另外重會有V12徽章以資識別；車廂布局亦極盡豪華，除空間寬敞闊落設備齊全之餘，當然唔少得重有承托力十足嘅高級真皮座椅，從而令享受程度更上一層樓。新車將於明年2月正式推出，有興趣嘅車迷不妨拭目以待。