恒指上周五彈升131點，個勢未盡。睇好大市，可以直接揀恒指Call輪埋手，例如9104、9195、9237，3件都係標準輪，個市升，佢哋一定升，反之亦然。9104溢價低啲，壽命短啲，爆炸力稍細，但只係相對於其他兩隻Call輪嚟講。9237交投最旺，想做盤，一兩秒鐘即可搞掂。
國企指數氣勢好勁，上周五單日升幅就已經係5%。若然估計國企大型股年底前繼續做WindowDressing，國企指數會繼續受到帶動，可以考慮吓啲國企指數Call輪，有兩件啱郁手，即9317同9363。9317明年5月夠鐘，輪價48仙，溢價1.5%，槓桿率5倍。9363明年6月到期，輪價33.5仙，溢價5.5%，槓桿率5.9倍。兩隻輪嘅數據都算相當吸引，要諗嘅係，佢哋上周五分別升22%同18%，喺𠵱家上車，抑或等回吐些少先至上車。
上周五和黃（013）有25仙升幅，但Call輪9914跌13%，收23.5仙。9914點解會失常，同正股變化有咁大分別？過多幾日，就踏入04年1月，隻輪1月26日屆滿，即係即將成為末日貨色，溢價將愈收愈細，𠵱家4.8%，槓桿率23.3倍。9914變化，提醒炒家，下月到期嘅Call輪，如果溢價唔低，避之則吉。
章 盛