寶Baby李國寶忽然放氣球話自己可能直選，搞到一眾政治記者魂頭轉向。記得八方寫過，明年在銀行界別，渣打總裁、候任銀行公會主席王冬勝有意去馬競選，重搵過一啲業內人士傾偈。姑勿論會否得到中資及外資支持，但肯定令寶Baby不敢怠慢。
寶Baby喺銀行界一直代表華資及主流英資大行以外嘅外資銀行利益，批葉劉一鋪起朵，深得人心。雖然啲大行好唔高興，但佢又同中方關係好，根本無法可施。不過，如果有機會，一定會玩嘢，即如上次就有人話支持孔公子啦。
有人批評寶Baby懶，但跑慣新聞之記者就鍾意佢敢言。八方每逢預算案，唯一要睇嘅議員演詞亦係寶Baby嗰份。從政有時重質不重量，唔係開得會多就好。講開又講，上個禮拜有日寶Baby同個仔喺香格里拉撞到何志平同李麗娟，何局長都冇同佢打招呼，你話寶Baby當日窒何志平篇演詞係咪夠晒辣呢。
傳真︰2623-9278
電郵︰