成日話香港地賣樓噱頭多，其實應該係香港人宣傳諗頭多先真，就連鬼屋都有得宣傳，講緊嘅唔係早排上晒港聞頭條嘅灣仔鬼屋，而係一間只存在於電影世界嘅鬼屋。
蘭西並唔係過界撈埋電影版，只係見到就嚟上畫嘅新片「鬼咁多大屋」模仿樓書嘅電影宣傳品，覺得好過癮，所以同大家分享吓。呢本鬼屋售樓書，內裏用字以至排版，都仿似香港嘅售樓書，例如話間屋鬼咁好景，皆因背靠翠綠山墳，市場罕有；鬼咁高三十呎樓底，氣派顯「嚇」不凡；層樓鬼咁與眾不同，給你一個鬼咁筍的家等等，非常搞笑。
此外，最抵死係夾附一張卡片，有愛迪梅菲個搞笑樣，公司名係鬼咁好搵地產，職位係鬼咁高級物業經紀，認真過癮。一份電影宣傳品，玩盡大家耳熟能詳嘅樓盤宣傳伎倆，話香港人同地產難捨難離，真係冇錯。
新地主席郭炳聯喺聖誕節前夕，仍馬不停蹄四圍參觀行家嘅售樓處，噚日蘭西收到風，話郭主席帶同負責賣樓嘅要員雷霆同周國賢，由大角嘴到尖沙嘴再轉去紅磡串燒睇樓，由下晝三點幾一路睇到黃昏六點。新地一行十幾人浩浩蕩蕩咁去到第一站大角嘴奧海城，參觀將軍澳蔚藍灣畔示範單位，重同信和員工密斟一輪，之後落去尖沙嘴港景峯商場，睇自己都有份，長實負責銷售嘅長沙灣宇晴軒，最後一站係紅磡都會軒商場嘅傲雲峰。
過幾日就到聖誕節，好似元朗四季雅苑呢啲咁有度假Feel嘅新盤，特別搞咗個「聖誕夢幻屋派對」，迎接聖誕節。樓盤以法國南部風情為賣點，將洋房加以布置，從外面睇就更加有外國色彩。連搵聖誕老人，都特別認真，專登搵法國人扮，喺現場表演雜技，重有人扮埋聖誕樹，夠晒氣氛。
現場又有攤位遊戲，好似畫面、做手蠟等等，小朋友未到聖誕節，就開始有得玩，加上西鐵啱啱通車，四季雅苑又喺錦上路站附近，難怪噚日吸引到咁多人去玩兼睇樓。
臨近年尾，又係物業管理公司最忙嘅日子，皆因有好多活動搞，重要兼顧埋防「沙士」嘅工作，估唔到今年重要忙多一樣，就係要爭報紙廣告。
蘭西聽業界講，由於房委會喺七份報章搞咗個「香港公共房屋管理五十周年誌慶特刊」，明日見報，房屋及規劃地政局邀請各管業公司落賀稿，咁當然要畀面啦！各管業公司於是四圍打聽行家點落賀稿，同埋計吓要用幾多錢，點落至唔會太寒酸。業內估計每家公司最少都要使十萬八萬。有業界就話，最得益嘅係報紙。
中山星晨花園發展已經超過十年，電視同報紙廣告相信大家都耳熟能詳，其中第七期以意大利水鄉情懷做主題，重有埋參照意大利威尼斯Gondola而造嘅小船，可以畀住客乘坐，喺屋苑嘅水道泛舟。呢隻船仔嘅建造商重獲得中國國家知識產權局批准，得到外觀設計專利權㖭，喺內地地產發展項目都算開先河嘞。
蘭西
電郵地址：