民建聯唔知係咪選舉輸懵咗，由以前嘅保皇黨，一夜之間淪為「逢董必反黨」。教統局提交嘅二○○四年大學開支預算文件，民建聯為求選票，臨天光突然瀨尿，拒絕支持，搞到李國章死死氣收回。
爭選票，使唔使去到咁盡？如果23條草案出籠，民建聯當日可以咁勇，又點會搞到今時今日咁老土？由以前嘅逢董必啱，到今日逢特必反，民建聯點樣向國家中央交代？
一個政黨為咗想收復失地，不惜打沉八間大學嘅預算計劃，大學教育俾民建聯一手政治化，唔怪得連科大校長朱經武都扯晒火。二○○四年大學經費，早已講掂數，削減經費，都係由二○○五到二○○八年，況且民建聯主力分子楊耀忠，自己亦係立法會教育事務委員會主席，二○○四年大學經費預算，民建聯冇理由唔知，突然發難，不惜將李國章同阿董擺上枱，為一黨私利，將大學生利益犧牲，左仔一係唔轉軚，一轉軚就去到盡，呢鋪性格，係喺文革之中修煉出嚟──共產黨領導人，好似劉少奇同林彪，今日重係黨國元老，一夜之間可以變為十惡不赦，做左仔嘅，今日之我打倒昨日之我，已經做到慣，估唔到呢鋪秘技，今日用嚟孝敬董政府，唔怪得老董主持西鐵開幕，黑口黑面。唉，睇開啲喇，若果政治信仰可以貫徹始終嘅，又點會係土共左仔？
最可憐就係朱經武，喺美國撈得好好哋，經唔起特區政府游說，當初想佢嚟香港做校長，講到天花龍鳳，要錢有錢，要權有權，呃咗朱校長落火坑，𠵱家先至知道原來係個屎氹。朱經武想返美國，唔知重有冇後路？
大學開支預算畀民建聯咁玩一玩，九月就開學，請人、添置器材、開課，樣樣緊迫，𠵱家乜嘢都要拖。大學生同民建聯無冤無仇。阿董累死民建聯啫，何必要大學生付出代價？
曾鈺成前主席重係行政會議成員，請問呢單嘢有冇協調？民建聯究竟想搞邊科？一夜之間立場突變，好似一張知識分子報紙，為求止蝕，一夜之間改做鹹報，原有讀者流失，新讀者又冇，民建聯咁搞，要照顧住北角一班老愛國嘅感情呀！
傳真︰2623-9278
電郵︰