從溫哥華回港度假的老友繼續登場。
老友上幾次返香港都喺夏天，高溫及濕氣幾乎將老友溶為一灘水，出親街都見佢口擘擘唔夠氣，成條脫水錦鯉咁。今次撞正係冬天，老友當堂生猛晒，十度左右嘅氣溫對佢呢挺北美洲人嚟講可以話係啱啱好，於是日日呢度去、嗰度去，享受人生樂趣。
「嘩，幾好天氣呀！幾爽呀！又有陽光，幾舒服呀！」老友着住短袖衫、短褲加白襪涼鞋，在銅鑼灣SOGO門口高聲呼叫，幾個經過佢身邊，着住大褸、頸巾、冷帽加天蠶內衣嘅四眼妹忍唔住掘一掘老友，九成以為佢黐線。
「香港𠵱家幾乾淨呀！條街又冇垃圾。」老友說，香港的確乾淨了，不知是大家的公德心進步了，還是罰款發生效用？反正市容是整潔了。「通街冇人敢吐痰，就算咳都會匿埋咳，衞生意識真係強咗！」慘痛的教訓，現在誰敢在公眾地方吐痰就是公敵，分分鐘俾人打一身。
「重有，你睇街度幾多靚車，款又新，又乾淨，架架令立立，好似呢款吉普車，我喺加拿大見都未見過，邊個話經濟差，我真係唔覺。」日日見住唔多覺？老友從外地回來看得最清楚，好與不好都是從比較而來，硬是要跟以往比，那實在沒得比，亦只有乾瞪眼。跟老友相處了一個禮拜，聽到佢對香港樣樣讚，突然覺得香港原來都好住得過。