黎明噚日去咗旺角一間學校，出席「公筷公羹安全衞生」宣傳活動，黎明以公筷大使身份做呼籲，重即場教小朋友用公筷，現場成班家長一見到黎明，重興奮過班小朋友，直情圍到佢實。
唔知黎明呢排係咪心情好，個人都幽默啲，佢話為免麻煩，於是教小朋友用右手揸公筷嘅同時，左手揸私筷，可以邊夾邊食，佢重即席示範，都幾搞笑。不過佢身邊個小妹妹一於好少理，實行你有你教，我有我食。
黎明同記者做訪問，就唔玩幽默玩番高深，問到有雜誌話佢喺台灣宣傳遲大到，老闆林建岳因此好唔妥佢，黎明舉起手做咗個冇人明嘅手勢，搞到全場記者呆咗，然後佢笑住咁話：「唔明就唔答，明就答你啦。」大家惟有猛話明啦，黎明就話：「人哋咁砌法，你重問我？想知乜原因，就去問傳播病毒嘅人，問電腦黑客，我只係演員一個。」咁究竟黎明同林建岳關係點？佢就話：「乜嘢關係唔使講，男人使乜講關係。」
提到好朋友王菲近日傳緋聞，話俾內地演員李亞鵬力追，黎明話佢唔知亦未聽過，但就講咗句：「人係正常嘅，拍拖又咁正常，唔拍拖又咁正常。」黎明份人真係有始有終，兜咁大個圈都冇人明佢講乜，唔該講重點啦。
樂壇新人黃馨同薛凱琪等，噚日喺無綫將軍澳電視廣播城為節目錄影，黃馨同薛凱琪大玩拔河，但黃馨就唔小心跌倒撞傷頭，需要即時召救護車送院，黃馨嘅經理人接受訪問時就話，黃馨擦傷咗背脊，去到醫院重喊咗出嚟，醫生話暫時要留院觀察，如果冇嘔吐就可以出院。
馬德鐘日前接受電台訪問時，一直唔刻意喺傳媒面前提起屋企人，因為佢話太太份人一向都係好低調，所以佢覺得應該畀番啲私人空間佢哋。另外，馬德鐘話希望將來可以向電影方面發展，有時間重想去進修一吓，咁當然佢都好想有機會攞到影帝呢個榮銜啦。衝上雲霄都不特止，重想衝上大銀幕喎！
江芷妮近日俾人發現同玩具大王蔡志明關係非比尋常，重俾傳媒影到佢同蔡生睇古董家具，但蔡志明就將成件事推卸到姪仔Gary身上，噚日江芷妮出席活動時解釋：「其實我同Gary係好朋友，因為佢而識到蔡生，大家都係普通朋友，嗰日係一齊食完飯，蔡生又想為其他物業添置家具，所以一齊去睇吓。」
余文樂同葉文輝（啤梨）等，噚日出席喺沙田舉行嘅「新城勁爆頒獎禮2003」拉票大行動，唔少歌迷專誠走嚟捧偶像場，但由於啤梨嘅歌迷叫囂得太厲害，連余文樂都支持唔住，要用雙手掩耳。計我馮仁昭話，如果係咁叫嘅係樂仔自己嘅歌迷嘅，佢就唔會咁嘅表情啦！
范植偉同張震等噚日喺旺角宣傳電影《地下鐵》，范植偉重即場講咗幾句廣東話，搞到啲fans呱呱叫，戲裏面張震同董潔有場咀戲，問到范植偉羨唔羨慕張震，佢話：「我又沒有很羨慕，因為戲中我飾演天使，反而看到這場戲我覺得很甜蜜。」扮過天使之後，真係連凡心都冇晒！
