艾斯頓古查（AshtonKutcher）喺今年搭上咗老佢成截嘅狄美摩亞（DemiMoore）而極速上位，不過艾斯頓喺美國咁紅，歸根究柢都係因為佢喺MTV台主持個專整蠱明星嘅節目《Punkd'》受歡迎，好多人都封佢做整蠱專家。
艾斯頓喺《Punkd'》裏面，曾經呃JustinTimberlake話佢觸犯法例，搞到對方喊而聲名大噪。臨近聖誕，艾斯頓又玩埋BeyonceKnowles，話說MTV台早前請Beyonce去一間兒童院度做聖誕大使，Beyonce應邀為聖誕樹插上最高嘅一粒星星。其間艾斯頓扮成一個聖誕老人搞搞震，喺Beyonce擒上張梯放低咗粒大星星之後，靜靜雞推跌棵聖誕樹，就連Beyonce都以為自己整冧咗棵樹，嚇到佢眼定定。
當班小朋友見到棵樹冧咗之後，個個都喊咁口，重以仇視嘅眼光望住Beyonce，好彩最後艾斯頓自首，否則Beyonce都冇可能走得出間兒童院。艾斯頓早排話整蠱人整到好悶，𠵱家諗住摺埋個節目，唔知呢個又係咪一個整蠱觀眾嘅招數呢？