成日講錢唔係萬能，但係冇錢就萬萬不能！好似意甲帕爾馬咁，明明季初以嚟踢得好哋哋，點知一傳出財政死火之後，成隊波即刻散晒。
連同上周六竟喺聯賽主場輸畀弱隊里賈納，帕爾馬已經輸咗兩場聯賽同一場盃賽，捧場客真係一殼眼淚。最新消息重話中田英壽好有機會喺一月嘅轉會市場重開時借去博洛尼亞，而且前鋒阿祖安奴、中場馬基安尼、後衞費拉利同門將費爾都有機會離隊……真係成隊拉素翻版一樣。
正因為帕爾馬危在旦夕咁款，而國內又冇財團肯接手，於是《米蘭體育報》最近傳出，有意接手英超列斯嘅中國大連實德總裁徐明可能係帕爾馬救世者。我求大俠就話，喺帕爾馬未明朗化前，波友暫時都係對呢隊波忍忍手好嘞。
韋斯咸諗住回升英超，但至今成績一般，主要係主力唔生性，新星前鋒迪科，由季初嗌走嗌到𠵱家，上陣時又成日領牌，喺上星期六作客華素爾時喺開波僅六分鐘就涉嫌踢對方球員被逐，攞咗今季第三面紅牌。其實如果迪科想走，就更加要有表現好，紀律咁差咪盞自斷米路！
利比亞狂人卡達菲成家最近做咗新聞人物，老竇同第二仔話會銷毀國內大殺傷力武器，效力佩魯賈嘅第三仔小卡達菲涉嫌服禁藥單案，已由意奧委會禁藥小組交畀足總處理。目前暫時停賽嘅小卡達菲，預料會正式被罰停賽。路邊社消息話小卡達菲有意上訴，咁到時咪又有得見報！
早排我求大俠好惋惜羅馬尼亞前鋒艾利竟然冇班落，不過𠵱家我要收回呢句說話。原來佢已喺英超聯樸茨茅夫試腳成功，連周薪都傾妥，但有一次練習後，樸茨茅夫領隊哈利列納想佢留低踢一場練習賽，佢竟然拒絕，話要去逛街！艾利咁唔尊重自己，梗係冇得留低啦！
保頓日前迫和阿仙奴，艾拿迪斯接受訪問時同上次贏車路士一樣，陰陰嘴笑。以保頓表現，我求大俠都認為佢哋值得搶到分，「大儍」現時最想當然奧高查留隊，話晒一月份硬仗多，又有聯賽盃，「大儍」已打破逢當最佳領隊必輸魔咒，睇今次會唔會又心想事成？