米倉涼子嗰頭好端莊咁喺韓國做完親善大使後，呢輪又畀面攝影大師篠山紀信，成為篠山新一任DVD寫真集系列嘅主角，而且比之前仲間由紀惠等人去得更盡，喺深夜大雨中施展濕身誘惑。
我羅拉一睇隻碟，就覺得意念同上年日本片《六月之蛇》大同小異，同樣係講一個東京女人喺大雨之夜入面，難以釋放性慾，於是嘗試透過性感嘅打扮而得到滿足。無論米倉係咪有心，相信fans見米倉咁好身材，就乜鬼都唔記得囉。
另外，我羅拉又八到原來人紅咗嘅米倉真係有啲恃紅生驕，佢啱啱決定接拍下月啟播嘅新日劇《我老婆係魔女》嗰陣，話明男主角嘅人選要佢批准先得，佢千揀萬揀，遲遲都未有決定，令電視台頭都痕。
聽講米倉重要求加插佢緋聞男友市川新之助嘅角色，構成佢一腳踏兩船嘅局面。而最後嚟跑出嘅，係香港fans唔多識嘅原田泰造，咁又唔係話原田唔紅，而係老老實實睇落唔會搶米倉鏡囉！