上周六香港天氣凍到震，小初提議食火鍋，成班老友圍埋一齊食嘢吹水，真係暖在心頭。
席上有人話，由年頭炒到𠵱家嘅創維數碼（751），今日公布的中期業績，可能相當正斗，不妨留意吓，有短炒機會。
小初記得，年中都曾炒過創維，當時在某間本地行同埋一間歐資行大力唱好下，隻股由幾毫子炒高到1元樓上，其間有唔少芬佬包括金手指在內密密收貨，可惜小初當時見好就收，只係短炒咗一轉，真係估唔到股價後來竟然可以衝上2元樓上。
創維上周五收2.075元，冇起跌，成交金額2548萬元，雖然股價較高位2.20元回落些少，但比起52周低位0.60元，大家就可以知道隻股真係升咗好多。
至於今次創維業績因乜咁靚？老友話都係老生常談，就係佢哋嘅電視機喺大陸非常賣得，邊際利潤有改善之類，雖然睇落好似冇乜新意，但創維超過七成營業額都係來自電視機業務，如果芬佬受落並睇好盈利前景，真係完全唔同講法。
慕容小初