繼許志安因在港台《十大中文金曲頒獎禮》沒獎攞而臨場缺席後，前晚莫文蔚（Karen）在出席《勁歌》季選時又炮轟港台浪費她的時間，Karen不滿地說：「冇必要叫人嚟又唔畀禮物人哋！」對此《金曲獎》總監李再唐回應說：「我哋唔係分豬肉。」
失意於《港台十大中文金曲頒獎禮》的莫文蔚（Karen），前晚在無綫《2003年勁歌金曲第四季季選》終於執番個桔，憑《看透》獲得「最受歡迎國語歌曲」獎；對於十大中文金曲食白果，Karen戥自己不值，認為自己應該獲獎。
Karen說：「我今年成績幾好，喺出邊亦好爭氣，幫香港攞咗好多個獎，嗰晚白白嘥咗時間，本來我拍緊電影《大佬愛美麗》嘅ending，全部人停工就我出席頒獎禮，我覺得好唔好意思，拍戲嘅嘢，分分鐘都係錢嚟㗎嘛！」
Karen又說：「頒獎禮應該好似party咁，應該開開心心攞禮物走，冇必要叫咗人嚟又唔畀禮物人哋，聖誕節應該開心啲好！」問Karen下次出席頒獎禮會否問清楚自己有沒有獎才出席時，Karen未有正面回答。
Karen又說：「我唔鍾意嘥時間，我好忙，有好多嘢做。」她可認為港台賽果出人意表？Karen笑了幾聲後說：「幾有娛樂性吖，我覺得唔似頒獎禮，似個騷。」
而對於有人認為港台當晚賽果猶如選大熱K歌，Karen說：「我到𠵱家都唔了解評選準則，唔想再諗。」
除Karen外，港台頒獎禮當晚只得一獎的陳慧琳（Kelly）亦坦言對賽果失望，但卻否認當晚因為失意而黑面，Kelly說：「我只係愕然啫！」對於容祖兒指「舞影行動」後的獲獎才是實至名歸時，Kelly語帶無奈說：「係囉，實至名歸！」
對於Karen及Kelly的言論，與及許志安因知道自己沒獎而缺席，港台《十大中文金曲》總監李再唐昨日回應說：「我哋唔係分豬肉吖嘛！佢哋出唔出席係自己決定，每個頒獎禮有自己嘅評選準則同基制，事前我哋已經好明確咁講明專業評選同公眾投票係點，如果歌手話要有獎先至嚟，好對唔住，我哋做唔到囉！
「講到話嘥時間，咁係咪有獎攞就唔嘥時間咩？睇吓人哋外國格林美同奧斯卡頒獎禮，都唔係人人有獎攞至嚟啦！梁漢文都話自己坐咗十幾年啦！我哋只係想呢個行業一齊去做一樣嘢，歌手可以去選擇支唔支持。」
此外，前晚在《勁歌》上跟關心妍不約而同穿上同一款斗零踭鞋的Twins成員蔡卓妍（阿Sa），在台上不慎拗柴；對於港台當晚許多歌手捧蛋，阿Sa說：「冇獎唔代表唔努力，有獎亦唔代表好勤力。」
採訪：王連連、李珮洳、戴彩煥
攝影：仇志德
