現年三十五歲的馬德鐘，八年前跟模特兒女友張筱蘭結婚，現育有一名五歲大的兒子。初出道時，馬德鐘並不介意以家庭做話題，但近年上位後，就封嘴不談家庭。
問馬德鐘是否擔心已婚男人形象會影響女fans心目中的遐想？他答道：「唔係，我從來都唔隱瞞結咗婚，但太太𠵱家係博士，我做幕前，唔想自己嘅工作令屋企人唔方便，佢哋都應該擁有自己嘅空間。」
馬德鐘外形討好，雖然緋聞不多，但卻予人花弗感覺，究竟為何會這樣呢？馬德鐘說：「好多時外形同花弗都係掛鈎，我對呢啲新聞好麻木，我嘅原則係唔鍾意攞緋聞嚟增加知名度，寧願自己行嘅路長啲，希望演技俾觀眾認同，好在太太對我好體諒。」
問到馬德鐘對兒子的期望，他說：「我會畀佢自由發展，絕對唔會將自己細個未完成嘅夢想強迫囝囝去完成。就算佢大個好想入行做藝員，我都唔會反對。」
馬德鐘即將跟宣萱在無綫新劇《五口之家》中再結片緣，會扮演一名住家男人。他說：「現實生活中，我有時都好住家男人，會照顧囝囝，同太太分擔家務。」
最初與馬德鐘構思怎樣拍照時，想到他喜歡音樂，便提議在銅鑼灣鬧巿演奏小提琴，他爽快應允。當日馬德鐘出現，即吸引過百男女老幼圍觀，大家圍成圓圈，很有秩序，令馬德鐘很感動。
採訪：比華利 攝影：陳慧安
場地提供：ryanleefitness