馬德鐘憑劇集《衝上雲霄》中扮演情深義重的機師Vincent後，人氣勁升，角色猝死更令觀眾印像深刻，可以說是「死得有價值」。馬德鐘回想當年毅然加入無綫，最難忘是出道時要賒借度日，捱了十年終得到今天的成果，何嘗不同樣是「捱得有價值」？
無綫劇集《衝上雲霄》剛播映完畢，劇中的有型機師凌雲志（Vincent）令馬德鐘的人氣衝上雲霄，劇情講述他發生交通意外身故時，更立即扭轉觀眾對角色的同情。近日馬德鐘上街，觀眾都叫他做Vincent，他笑言考慮把洋名Joe改為Vincent。
問馬德鐘如何揣摩飛機師一角時，他說：「我就憑直覺，再加入後來實景拍攝時嘅相處，交雜滲入角色。我覺得Vincent呢個角色初初唔討好，不過導演安排佢死即刻令觀眾好懷念，加晒分。」
不少人覺得馬德鐘的角色比同劇中扮演好兄弟的吳鎮宇更搶鏡，他謙稱說：「唔好咁講，我同鎮宇合作好大壓力，佢冇開聲指導我點演，只係大家自由發揮之間擦出火花。」角色如斯受觀眾歡迎，難怪馬德鐘希望可以憑藉這個優勢取得台慶獎項，他說：「我恨攞獎㗎，係一份好大嘅推動力。」
馬德鐘在未加入娛樂圈前，曾任職保護要人組（G4），後在九三年加入無綫後，捱了整整十年才等到今天，回想當年的辛酸，馬德鐘說：「記得當年人工只有九千蚊，淨係屋租都七千二百蚊，重要養家。試過出糧交完租唔夠錢用要周圍問朋友借，結果拖咗一排先還番。」
馬德鐘希望演繹不同的角色，讓觀眾了解他多些，日前馬德鐘就化身成小提琴家，在銅鑼灣鬧巿拉小提琴，原來他的童年夢想是成為一位音樂家，馬德鐘說：「我小學時喺音統處學過小提琴幾年，但後來因為病咗冇上堂，課程又追唔番就放棄咗，我好希望將來可以擁有一個自己嘅演奏會。」
問到馬德鐘未來還要試演甚麼角色時，他衝口而出說：「撒旦，我從來都未試過演大魔頭角色，等觀眾可以接受我扮唔同角色。」
