徐子淇噚日喺尖沙嘴出席「尖沙嘴中心及帝國中心聖誕廚神煮美食」活動，即場跟大廚學煮越南菜同馬來西亞菜，子淇煮嘢食雞手鴨腳，煮其中一味鑊仔蝦時，學大廚拋鑊，結果將鑊入面嘅配料同蝦都拋晒出嚟，搞到一地都係，嚇到坐喺前面啲人雞飛狗走！不過試咗幾次之後，子淇終於都學曉拋鑊，而且重有現場觀眾敢試食佢煮嘅餸㖭。
子淇話自己廚藝超級低能，喺英國讀書要自己煮嘢食，結果每次都搞到一屋煙，連防火警鐘都響埋，重因為咁而識咗兩個大隻消防員！今年子淇個妹去埋英國讀書，大家一齊住，個妹見佢連煮公仔麵都搞到成個廚房起晒煙，已經唔畀佢再入廚房。
子淇又話上星期喺英國返港同屋企人過聖誕，趁有時間去shopping，點知就俾本報記者影到佢當眾換衫，子淇話當時係着住件tubetop，貪方便冇入試身室試衫，點知個角度影到好似冇着衫咁，子淇話以後都唔敢貪方便囉。
吳卓羲噚日接受港台節目訪問，有好多師奶同後生女打電話入去，主持人即時封吳卓羲做少女同阿婆殺手。佢有份主演嘅《衝上雲霄》噚晚大結局，吳卓羲同朋友打賭話結局收視會有三十七點以上，如果佢輸咗就要請朋友食飯！而今日吳卓羲重會去番禺登台，呢排佢就好努力咁去唱K練歌。
蕭正楠早排幫一個韓國音響產品做代言人，佢噚日就去旺角推銷產品，吸引過百人圍觀，佢話讀書時做過服裝店售貨員，當時重幾間舖頭比賽，睇吓邊間賣得最多牛仔褲，結果佢以五條之微贏咗，而噚日佢喺十五分鐘之內賣咗成六部MP3機，做咗成八千幾蚊生意，相當厲害。
好姨薛家燕噚日為維園舉行嘅《滅癌獻愛心》活動擔任「愛心之星」，佢話早排因為工作關係識咗個女婦科醫生，重介紹佢去做身體檢查，check過之後知道冇乜大礙。好姨話其實癌症呢樣嘢最好及早醫治，所以年年做身體檢查就最穩陣不過。
鄭明明前晚喺尖沙嘴出席「愛的連繫」聖誕慈善晚會，佢話好友劉曉慶同鄧萃雯做咗好朋友，事緣鄭明明將劉曉慶俾人扣留嘅情況講晒畀鄧萃雯知，佢知道後就寫咗封信畀對方，劉曉慶收信後好感動，當佢知道雯雯又去咗橫店拍劇，即時相約見面，咁就成為好友。
曹敏莉前晚同魯振順及王俊棠等出席九龍灣展貿中心嘅「歡樂滿東華2003頒獎晚會」，曹敏莉話：「我最難忘可以同郭富城一齊表演，佢真係好靚仔，唱歌同跳舞都好出色，能夠同佢合作真係我嘅榮幸。」下個月十七日曹敏莉會參加華裔小姐選舉，而喺參選前嘅聖誕節，佢會約埋啲港姐狂歡一晚。
劉香萍同女兒貝安琪前晚出席尖沙嘴一間首飾店開幕儀式，劉香萍話自己遲啲會執導一套由德國同美國資金投資、預計成本約一億五千幾萬嘅電影，除咗佢個女貝安琪有份參與之外，男主角亦會係香港知名演員，但係就唔講得係邊個住。
