聖誕節無食過聖誕大餐又點算過聖誕？想搵間價錢平地方又就腳嘅，點少得香港最旺的人氣區－銅鑼灣和旺角。今日介紹呢兩間餐廳風格截然不同，一個大堆頭，一個小圈子，不過同樣是二百蚊有找！
記者：李湘虹 攝影：陳陶鈞
一大班Friend邊度過聖誕夠熱鬧夠盡情？首選當然是銅鑼灣！銅鑼灣最近新開一間佔地超過8,000呎的意大利餐廳分店，最適合成班「飲食朋友」一齊嘻嘻哈哈。而且呢間餐廳出名大堆頭，最抵的還是食完可以免費添食！是名副其實的聖誕「巨無霸」餐！
火雞餡料（前）、合時雜菜（後）：焗好的火雞餡料因為實在太大份量，所以會另外碟上，餡料吸收雞油精華，非常惹味，可以蘸上甘巴利醬或火雞肉汁。合時雜菜包括椰菜、西蘭花和甘笋，加上少許蒜茸炒，特別清香爽口。
蘋果批伴呍呢拿雪糕：從來愈簡單的菜式愈考廚師的功力，好像蘋果批用的一定要是未熟、又酸又硬的青蘋果，這種酸味特別原始新鮮，再配上肉桂粉和糖，很有田園感覺。
焗火雞：歐洲和美國家庭每年聖誕例必食火雞，全家人圍坐共同分享火雞，很有一家團聚的氣氛。這隻火雞足有10磅，跟足傳統做法，將火雞肉連餡料如麵包粒、西芹、洋葱和香草等釀入原隻火雞內，以165度高溫燒1小時，然後外皮金黃香脆的火雞肉會預先切好一片片上，包你食到攬住肚。
新鮮麵包、意式沙律、焗火雞、火雞餡料、薯茸、甜甘芋、合時雜菜、蘋果批伴呍呢拿雪糕（除甜品外，其餘菜式可要求免費添加）
收費：$180/位（另收加一服務費）
（圖片食物約為8人份量)
電話：25746263
地址：銅鑼灣告士打道250號伊利莎伯大廈1/F102室
營業時間：
12:00nn-12:00mn
要在鬧市中找一處隱蔽的地方傾密偈、自己圍內玩到天光都無人理，以下這間位處砵蘭街的TogetherCafe應該啱你。可能因為負責人全都是玩得的年輕人，所以在這裏客人可以好舒服，想點就點，可以自己打碟聽歌，玩塔羅牌占卜……總之比屋企更Free！
波士頓龍蝦配鮮蘑菇聖誕意粉：原隻芝士焗龍蝦開邊煎香，味道濃郁比得上酒店貨色，再配上雪人薯茸，加上聖誕三色，即番茄（紅）、莧菜（綠）和原味（黃）的意粉，是餐廳誠意的應節之作。
雪糕班戟（前）；芝士焗西蘭花（後）：前菜和甜品的菜名十分普通，但賣相十分「聖誕」，好像星星（楊桃）和月亮（蘋果）伴雪糕班戟，芝士焗西蘭花有如覆蓋白雪的杉樹，令整個聖誕餐份外有心思。
古法龍蝦湯、芝士焗西蘭花、3選1主菜（A.波士頓龍蝦配鮮蘑菇聖誕意粉、B.扒大蝦牛柳、C.白色聖誕銀鱈魚）、雪糕班戟及餐飲（任何菜單上飲品）
註：每人贈送神秘聖誕禮物
收費：A.$128；B.$148；C.$168
電話：27716833
地址：九龍旺角砵蘭街134號地下（近登打士街交界）
營業時間：11:00am-2:00am