上個禮拜僑雄國際（381）突然停牌，然後又喺禮拜五復牌，一升就升咗兩成有多，重打埋入10大升幅榜。伏勝記得喺年初既時候曾經跟進過呢隻股仔，雖然嗰次冇賺到大錢，但係對比番年初個價，其實都升咗一個開有多。今次隻股再次郁番，原來係旗下公司同國內中化國際及桑陽紡織組成合營公司，開拓氨綸生產線，用嚟生產毛絨之纖維，中化國際就會為合營公司以5%折扣價提供源材料。
就咁睇呢單交易好似唔係好起眼，對僑雄現時業務唔係有好多幫助，不過管理層就非常重視，聽講重特登開個飯局向財經界做推介，話中化國際係國內10大企業，拍得中化應該唔會冇景。照伏勝睇，隻股早前已經吹風話會批股，上個禮拜連中銀香港（2388）咁大隻嘅股份都成功批埋，隻股仔分分鐘趁勢批埋一份都唔定。
台灣發現今季第一單沙士個案，所以近排突然好多人講有關沙士嘅話題，唔少藥業股有咗炒作藉口，啟動引擎熱身。有個老友上星期來電，就叫伏勝留意吓隻生命科技（1180），話佢哋雖然無研究及製造抗「炎」藥物，不過亦有參與其他「抗炎」行動，尤其係一向喺研究肝炎藥上花咗好多資源，可以話已達到專科級別。
聽個朋友話，佢哋有一隻新嘅對抗肝炎藥已經開發好，亦已經向花旗國嘅藥檢局遞交咗申請，如果一批准，隻藥就會即刻推出嚟，到時若賣個滿堂紅，出年成績表一定會好好睇。睇番個價𠵱家喺9仙左右橫行，雖然重未有突破迹象，不過個朋友叫伏勝早買早着，因為隻股隨時郁番，重話出年目標見兩毫子樓上。
伏勝