失業率啱啱有下跌趨勢，應該可以減輕一吓經濟發展及勞工局局長葉澍堃最頭痛嘅問題，點知另一頭佢又當住全世界面前話自己趕住要睇牙醫，唔通頭痛完變牙痛？
大班記者噚日追住葉局長問延遲演出嘅「幻彩詠香江」激光滙演，佢一見記者圍埋身，已經好醒地笑笑口有言在先，話自己一陣要去睇牙，記者跟住係咁問佢滙演係咪難產，佢答嚟答去都唔認有問題，記者當然唔係咁滿意，點知問多兩問，葉局長又話自己趕住要去睇牙，雞咁腳溜走。
照計如果唔係牙痛都唔會咁趕，俗語話牙痛慘過大病，要走記者都會諒解。不過事實係點，相信就好似「幻彩詠香江」延後嘅真相一樣，只有葉局長自己知。
（圖）葉澍堃笑容燦爛露出一口雪白牙齒，點睇都唔似有爛牙。
成啓聰攝
傳真︰2623-9278
電郵︰