年近歲晚，易經占卜老師阿桂姐來電賜教，當然係教左丁山如何在甲申猴年趨吉避凶，桂姐每年都出版流年預測益街坊，佢預先講嘅嘢，點敢收埋，當然要公諸同好。
據《猴年問阿桂》占香港甲申流年金融走勢，香港大市缺乏主導性，冇明確方向，但炒作活動頻繁，以短炒消息為主，初春時分，股市一片好景，仿似欣欣向榮，夏季更是熱錢四竄，利好消息甚多，大市高潮迭起，可惜過後無痕，財來難聚，到咗秋冬期間，負面消息出籠，大市回落。故此桂姐話：「出年得些好意須回首，唔係就蝕到你嘔！」各位小心使得萬年船呀。
地產又如何呢？基本上來年市場消化能力不佳，市道旺一輪之後，欠缺承接力！桂姐教落：「唔好用隻耳去做人，買樓要三思而後行；負資產預埋你一份，買貴咗樓你就頭痕！」嘩，好驚啫，阿桂姐唔好嚇人呀！
流年地運又如何？十二月十六日，驚傳台灣發現沙士，電腦J剛好自台灣返嚟，左丁山叫佢一個禮拜後先至好嚟搵我。電腦J大罵左丁山膽小怕事。明年猴年，香港人對傳染病特別敏感，異常恐懼，但太歲與香港流年冇沖犯，故此戾氣冇乜大殺傷力，只係增加心理壓力啫。桂姐講：「香港人，請放鬆，平衡身心，萬事無憂！」
綜合桂姐所講，猴年炒股可小注怡情，見好即收。炒樓可免，買樓務須審慎計算負擔能力，咁就身心健康！