小朋友的開心聖誕，除狂收禮物外，大概都離不開火雞、布甸、朱古力等大堆美食。你心目中渴望嘅聖誕大餐係啲乜？一班小蘋果會員就話想試吓「自食其果」，重約埋一齊學整聖誕曲奇。他們從未下過廚，當整曲奇餅如搓泥膠，薑餅人、聖誕樹、雪人……做的過程中雞手鴨腳，但就能親嘗美味聖誕！
記者：月桂樹
攝影：大權
從未下廚的小朋友，似乎對整嘢食冇乜概念，當導師話首先要量175克麵粉時，個個都眼定定！全場冇乜反應，導師惟有親自示範，將麵粉倒進量杯中，並吩咐小朋友要昅實容量刻度。哦！原來咁樣叫量麵粉。之後小朋友就自動自覺，好有默契咁互相配合：你倒粉、我睇實量杯。可能係第一個步驟，小朋友大大話話用了約20分鐘才完成這個動作，但過程尚算順利，沒有一個小朋友打瀉麵粉。
量好麵粉，再加埋適量牛油後，便來到整個煮食過程中最論盡的一環。因為小朋友要將「散修修」的麵粉，混和「黐𣲷𣲷」的牛油，將兩者搓成一糰。嬌滴滴的女孩子開始好抗拒：「咁邋遢，我唔敢搓呀！」但當見到男孩子們愈搓愈起勁，一時又話搓了個大波波、一時又將兩個圓粉糰叠埋話係雪人之後，就搓得比男孩子還要落力，不介意做污糟貓！而且個個愈搓愈得戚，明明搓來搓去都散開了，但仍說：「好容易啫！好似玩泥膠咁！」
好不容易搓成粉糰後，便可利用各種形狀的模具，吸出想要的曲奇形狀，聖誕樹、薑餅人、心心，不過最受歡迎的竟然是星星。由於小朋友搓麵粉的手勢不太純熟，吸出來的薑餅人不是斷手就是斷腳！不過小朋友都好醒目，唔使人教都識得再搓小小粉補番個位。完成時都唔失禮㗎！
最後就為出爐的曲奇加上裝飾。五顏六色的糖霜搏命咁加，可以想像他們炮製的曲奇必然是全世界最甜美的！不過最搞笑係糖霜及碎糖永遠加唔完。點解？小朋友邊加邊食、邊食邊加……
屋企嘅小朋友係咪睇到流口水呢？你都可以同佢哋一齊整聖誕曲奇㗎。
材料
牛油100g、全麥麵粉175g、糖50g
小朋友整嘅曲奇零舍繽紛，大人眼中可能是鬼五馬六不敢吃，但他們卻自得其樂，個個都話好滿意自己嘅手勢。
小朋友除了學整曲奇外，更深層意義原來是透過Playgroup學英文。這裏的課程由外籍導師教授，並以一般不多於5人的小組形式進行。課程極具彈性，可以學煮食、學做手工、學電腦、學話劇……總之會按你的要求開班，好似時近聖誕便可進行各種與聖誕有關的課堂，目的不過是透過活動學好英文。
LanKwaiFunPlaygroup
地址：中環蘭桂坊15-17號協興大廈1樓A
電話：29840234
基本收費：$1,650（4堂，每堂2小時）
＊由於可彈性開班上課，有興趣的話不妨再自行致電查詢。
＊若成為Poco'sFunClub（包羅多個兒童學習中心、以至兒童牙醫保健）的會員，可獲85折或更高的學費優惠。會費為$580一年。
