早兩星期前，碟場已開始放風《大隻佬》會出DVD，直至上個星期尾聖誕檔期前夕，終於見街！可能餓咗兩個星期關係，星期五傍晚行過旺角街頭DVD舖，入去買碟嘅人都差唔多人手一隻；有連鎖式DVD舖店員話一晚銷量，已經上百多隻！馬上登上本周最熱賣DVD碟！
記者：朱崇德
繼《瘦身男女》之後，劉德華今次喺《大隻佬》已經係第二次以「人肉衫」披掛上陣，儘管華仔話件衫着得有幾辛苦，不過呢件喺美國特別度身訂制嘅「人肉衫」，的確改進咗好多，唔再有肥腫難分嘅手指，就算以一身肌肉示人，像真感一樣天衣無縫！所以一開場華仔所飾的大隻佬，就以T-Back脫衣舞男、再加祼跑上環電車路玩ShowOff！相信一眾華仔男、女Fans，都睇得熱血沸騰吧！
故事內容，主要講述大隻佬是一個得道武僧，在一次追捕殺害青梅竹馬女友小翠的兇手過程中，在山上七日七夜參悟佛理，看破「因果業、輪迴道」，不過自此亦脫去袈裟，還俗為凡人；張栢芝所飾的香港女警李鳳儀，在一次舞廳放蛇行動中，巧遇大隻佬，並馬上墮入愛河；可惜大隻佬眼中所見，是她背後的輪迴劫難，儘管將佢身邊嘅勁敵──會縮骨功的印度佬及飛簷走壁的小偷一一捉拿，李還是劫數難逃！
發行：美亞鐳射影碟
區碼：全區
音效：杜比數碼5.1
價錢：$75
講真！筆者一直都係杜琪峯同韋家輝嘅Fans，今次《大隻佬》真係將娛樂性同故事性，都拿握得非常平衡！前半部將大隻佬塑做得成個現代版濟公一樣，參悟佛道，但又孔武有力，多強的敵人，都被佢一一擺平，娛樂性十足！
後半部故事，大家亦可參悟人生哲理；好似好殺的重案組探員，不惜代價的追緝兇犯，最後得大隻佬點化，在最後關頭，放下屠刀立地成佛，但回首前塵已是弄得滿身傷痕；又例如大隻佬所追逐的山上兇人，最後發現原來竟然是另一個「自己」，人要自悟，擁抱仇恨，先可以真正成佛，故事中人生哲理，真係令人再三細味！
可能今次《大隻佬》DVD出得比較急嘅關係，Bonus部份真係冇乜嘢睇，甚麼NG鏡頭、刪剪片段都全部欠奉，好彩「製作特輯」，有解構件大隻佬衫，同杜、韋、劉三人解說此片的內裏涵意，上次喺戲院睇到一頭霧水，咁就一定要睇今次嘅解讀。
