最近傳出愛斯賓奴將會爆半冷跑出，簽得「自由身」球王李華度！我求大俠就覺得如果係真，李華度呢鋪就博得大咗啲嘞！
報道指李華度口頭上已答允加盟呢支暫排西甲聯榜末球隊，加盟機會都好大。相信佢此舉，除咗可着上愛斯賓奴球衣倒戈鬥球隊死敵巴塞，激死當日唔肯同佢續新約嘅巴塞高層外，重有就係可以再次證明自己實力，希望救到球隊護級成功。
但睇愛斯賓奴家陣情況都幾惡劣，我求大俠就唔睇好李華度以一人之力，可以成功幫手護級。睇怕若事成，李華度呢位球王隨時跟球隊一沉不起，職業生涯係咁先！
諗起熱刺後衞薛基，我求大俠都忍唔住神傷一番！佢由上季元旦傷到𠵱家，最近復操都要再傷一鑊，又唔知幾時至打得嘞！諗諗吓，其實呢幾年被拜仁放走嘅球員，好多都變成「容易傷病的男人」，例如P安達臣、巴布、泰勒、薛基等，唔通佢哋一早已經俾拜仁搾乾搾淨晒？
除咗李奧費迪南外，中國球員張帥亦因禁藥問題面臨處分，所屬球會北京現代就先「做嘢」，罰佢三個月，另罰五萬人民幣。我求大俠真好唔明球會準則，因為傳緊中國足協會罰佢停賽兩年，所以球會罰佢幾多個月都冇意思，但冇波踢冇糧出，重要罰佢五萬銀，都幾揦脷喎！
英國𠵱家好凍，啲比賽隨時因場地結霜而打唔到；而葉士域治為咗佢哋主場對諾域治場英甲可如期舉行，就用個熱氣墊鋪住塊草地。「老葉」搞咁多嘢，無非想趁諾域治病攞佢哋命。諾域治近況好好，弊在啱啱走咗正選前鋒赫格比同哥治，搞到要用新仔，「老葉」又點會錯過機會！
NBA狀元爺勒邦占士對新波鞋今日喺花旗國全國發售，有啲輿論重話可以買個滿堂紅㖭！正所謂人逢喜事精神爽，勒邦噚日作客76人時又再大發神威，轟入三十六分，差一分就可以平自己啱啱創出嘅職業新高三十七分。終止咗騎士連續三十四場作客輸波嘅羞家紀錄。