政務司司長曾蔭權最近為寶貝仔娶新抱擺完酒，噚日又喺官邸為呢頭婚事搞多次酒會，可能煲呔曾最近行情稍為看漲，所以嚟捧場嘅賓客亦絡繹不絕。
可能大家唔係好明，一直俾特首擺歪嘅煲呔，點解會話佢行情看漲？咁就同兩英相爭有關，「兩英」即係唐英年同梁振英，都係下屆特首大熱。不過睇到最新形勢發展，有一派嘅分析係買冷馬。
唐英年臨危受命，如果真係好命到除阿爺之外，連外圍經濟都幫埋佢，就發達咯，香港人咁鬼迷信，好腳頭非常優勝。
至於話過N屆都唔會做特首嘅梁振英係永遠嘅大後備，中央一無人選，佢老哥隨時候命，唔係佢坐喺行會咁耐做乜嘢？講穿咪係等機會啫。
不過，唔好彩喇，唐英年已經脫離咗嘅自由黨，發動咗七七事件，田少為救港，不惜傷害同老董及中央嘅感情，呢個肯定扣分，班土共一定唔會放過田唐一族。
至於振英哥，就一直討唔到大眾嘅歡心，原因好簡單，佢永遠無強烈睇法，永遠唔知佢想講乜，怕者連土共都唔知你乜料，點令班商家服你。
所謂「鷸蚌相爭，漁人得利」，咁兩英對撼，你話邊個有機做漁人呢？所以話唔好以為煲呔冇晒機會。
傳真︰2623-9278
電郵︰