精明消費：<br>南生圍點止得鱷魚各國家具擺設平賣精明消費：
南生圍點止得鱷魚各國家具擺設平賣
星期六要搵新消閒地點，十個有九個會話去南生圍觀賞鱷魚，不過去完南生圍之後咪以為附近無其他好去處，轉個彎過隔籬的路口，就會見到一條小街擺滿各大小攤檔，當中有唔少工藝品、小型家具擺設等以筍價發售。據街坊講，呢度周末周日特別熱鬧，今日一於改變行程入去八一八。
記者：何善華
攝影：陳盛臣
Model：Lily（SunSpot）
今日首次踏足南生圍，發覺這裏的產品來自世界各地，好似印尼、南非、印度、中國等，大部份都係店主自己親自去當地入貨，價錢比市區便宜得多，真有衝動買幾件返屋企。
中國代表
黑色矮木椅
呢張矮木椅產自浙江，外形過癮，唔當椅子坐亦可作家居裝飾。全木製易打理，一抹搞掂，放在天台或花園都得。
尺寸（cm）：73長×60闊×70高
售價：$395
街價：約$600
槮木鞦韆木椅
如果屋企有個大花園，呢張鞦韆木椅的確吸引。槮木質料可以日曬雨淋，而且較為耐用，椅身可坐三個人，一邊搖曳一邊閒談家事逸事，誠一樂也。
尺寸（cm）：150高×160闊×160長
售價：$1,200
街價：約2,500
南非代表
古典花紋書枱燈
極具藝術氣質的古典花紋書枱燈，來自上海，繽紛的燈罩最為吸引，配埋淡黃色燈膽，令整間屋的格調更加柔和。
售價：$750-$850
街價：約$1,400
印尼代表
矜貴木馬
木馬玩具都算係童年時最奢侈的玩具之一，唔係大富之家都唔使旨意有，店主專誠由南非運抵港，木馬上的毛髮全是真馬毛，逼真程度一流。
售價：$1,200
街價：約$3,000
扶乩字形黑木盒
這些別致黑木盒，同樣是來自南非，盒面上刻滿一堆鬼畫符，不覺陰森恐怖，反而富藝術氣質，香港其他地方很難找到。
售價：$150
街價：約$250
印度代表
印尼布貓公仔
木筒大花貓略嫌呆板的話，最近由印尼新返的布貓公仔可會合你心意？全部以人工車製而成，備有多款不同形狀的布貓公仔選擇，相信總有一款你鍾意。
售價：$40-$80
街價：$60-$100
木筒大花貓擺設
曾經喺市區見過呢款大花貓擺設，一套大中細三件至少標價千五蚊先有交易。大花貓的外形設計成直筒，豎立唔阻地方，作為家居擺設夠晒有特色。
售價：$950/套
街價：約$1,500/套
罕有手繪木枱
店主千叮萬囑要小心擺放，因為這一套三件來自印度的裝飾木枱絕對不是泛泛之輩，枱身的花紋全用人手繪刻設計，手工超凡，聽落似收藏品多過實用品。
售價：$1,600/套
街價：約$3,000/套
蠟燭座枱燈
這盞座枱燈，甚富民族色彩，紅色奪目的玻璃燈罩配上金色花紋，精緻高貴。此燈可以用蠟燭燃點照明，同樣喺印度返貨。
售價：$350
街價：約$600
陽光園藝精品廊
地址：元朗錦繡花園迴旋處南生圍入口花卉市場 電話：61871329
營業時間：12:00nn-7:00pm（平日）、10:00am-7:00pm（假日）
交通：上水火車站乘九巴76K或元朗（福康街）專線小巴75或76號，於南生圍迴旋處落車，另入口有免費停車位。
備註：大件家具元朗區免運費，市區由$100-$200不等（離島除外）。