美股反彈，而那打素醫院七個發燒病人又證實唔係SARS，港股有驚無險，上升131點，收報12371，成交163.49億元。
不過，港府就唔係幾好，特別係唐唐。民建聯要挽回民心，由學生層面入手，反對削減教育資源。在可見將來，民建聯估計會反對政府大部份削減開支建議，或增加收入來源的建議，結果就係唐唐在滅赤方面困難重重。但唐唐一向腳頭好，希望佢望天打卦之餘，真係有黃金自天上來。咁嘅政治局面，阿虎都冇眼睇咯。
歐資前日炒完公路股，噚日再炒石油化工股，中石化（386）同中石油（857）各升7%，外資直情當呢兩隻重磅股係二三線股咁炒。黑客話，其實嗰啲唔係基金買盤，只係對沖買盤，用作發行國企指數衍生工具同相關備兌證，所以中石油同中石化沽空金額都唔細。
阿虎早前聽過蜂林（8156）會引入德隆產業作為股東，蜂林炒味增加。噚日蜂林宣布以900萬元人民幣，向德隆產業購入新特葯5%股權，睇嚟係德隆入股蜂林的序幕，相信好快就會有一連串動作出現。不過，蜂林似乎重未熱身，噚日收報0.94元，升1%，唔通要等到新年過後至有動作跟尾？
金管局下周三之前將公布人民幣清算行結果，大熱門中銀香港（2388）可能再炒高都唔定，而早前認購中銀香港舊股的基金，亦需要推高股價粉飾櫥窗。中銀配股價13.70元，基金就算推高至15.10元年結，帳面賺10%，亦唔算誇張。
阿虎