美股隔晚大升過百點，港股立即醒神，恒指埋單升131點，報12371，重返10日線之上，睇圖搵食者，又會覺得個市唔係咁淡。其實一到年尾，好多人要裝飾櫥窗，呢個時候炒輪，始終係揀Call好過揀Put。
下個禮拜多假期，節日氣氛漸濃，股市會靜好多，到時窩輪溢價會再縮，炒友要留意，太高溢價者咪隨便玩，而且最好快買快賣，千祈咪長情。
聖誕鐘一響，滙豐（005）又會多人唱，低溢價之滙豐Call輪可以買番多少玩吓。對象有兩件，第1件係9136，現價1.38元，明年4月初到期，溢價只係1.9%，槓桿率有8.6倍，數據唔錯，而且交投有番咁上下，炒出炒入好容易。另1係9156，玩到明年4月中，現價0.98元，溢價2.8%，槓桿12.2倍，數據亦好，缺點係成交冇9136咁熱鬧。
中石油（857）有消息入市，股價大升7%，帶起相關Call輪，昨日10大升輪，中石油Call輪佔咗7件。升得最厲害係9405，一飛就54%，但以數據而論唔見得抵買。
中石油17件Call輪當中，有一隻（9381）唔升反跌，且跌足1成。點解？因為呢件係窗口定界Call輪，在12月11至24日呢段窗口期，正股要跌佢先至有機會升。特種輪近排愈出愈多，大家玩之前要睇清楚。
章盛