今年冬季甚興冷織物，所有冷衫、冷裙、冷頸巾都是潮流之選，對男士來說，一件大冷衫加牛仔褲，已經方便有型又瀟灑。
穿衣一向崇尚簡單自然的梁漢文，日前就以這條衣着方程式出現，上身穿上價值千多元的日本品牌Uno冷衫，Uno出名品質好，着上身零舍自然，下襯古着牛仔褲，腳踏一對購自法國、價值二千多元的Hermes鞋，便相當有型，上身東洋味與下身的歐洲風格，casual之中帶點classic味道。
梁漢文表示最愛簡便服飾，他說：「我對衣着其實冇乜特別要求，亦唔一定要名牌，除非出席隆重場合，否則多數着牛仔褲，買呢對Hermes鞋都係因為覺得靚，而且又襯到casualwear。」
梁漢文認為穿衣服最緊要切合個人風格，他說：「我鍾意啲colorful嘅顏色，個人睇落會sharp啲，但cutting方面唔會揀太花巧嘅，亦好少佩戴飾物，總之就以簡潔為主。今年興冷衫，着件大冷衫再加牛仔褲就出得門口，前後唔使十分鐘就諗好今日嘅造型，快靚正。」
採訪：黃君怡
