早前已宣布明年結婚的郭可盈日前到內地拍攝樓盤廣告，她為了配合宣傳，還大開金口演繹廣告歌。可盈表示自己對唱歌都很有興趣，有機會都想加入樂壇發展，可盈進入錄音室更吃了朱古力開聲。
郭可盈日前到順德拍攝一個內地樓盤廣告，屈指一算已是第四年出任該樓盤的代言人，她今次拍廣告還被邀唱主題曲，大開金口。
廣告商四年前開始找可盈做廣告的「開荒牛」，以往廣告歌都是由漢洋主唱，但這次卻改由她演唱，可盈日前在電話訪問中說：「今次漢洋會幫我做廣告歌嘅監製，我錄音嘅時候都好順利。我一聽廣告歌嘅旋律都好鍾意，感覺好舒服同易上口。」
問到可盈進錄音室時有甚麼禁忌，她說：「我冇乜嘢準備，狀態隨時都ＯＫ，我當日重食咗朱古力，我哋拍戲嘅都冇乜護聲方法，不過我知道有啲歌星喺錄音前一定唔會食甜嘢，佢哋怕惹痰，但我一啲都唔介意，錄音時都好順利。我聽朱茵講佢錄音就要食某隻牌子嘅朱古力㖭。」
可盈平時都喜歡唱卡拉OK，她說：「我嘅飲歌係Kelly（陳慧琳）、Sammi（鄭秀文）同Joey（容祖兒）啲歌，我鍾意中板同輕快拍子嘅歌。」
可盈在廣告中會有多個造型，她更會穿上晚裝，展示高貴形象。昨日是林文龍的生日，而聖誕節後，可盈便會忙於籌備明年的婚禮，她說：「文龍話佢婚前最後一個生日，佢要我特別啲同佢慶祝，另外我都會準備一份特別嘅聖誕禮物畀佢。」
採訪：比華利
