長沙灣順景華庭首創嘅家傭宿舍，噚日終於有得去現場睇。宿舍坐落大廈一樓，佔地大約五千方呎，共分為三部份，包括七個提供二十八個牀位嘅房間，一個公共浴室，同埋一個足夠容納超過一百人嘅飯堂，裏面重擺放咗幾部電腦同埋大電視，重有一個售賣特產飲品小食嘅檔攤，設備相當完善。
發展商普基發展董事總經理何其建話，之前睇報紙，有家傭因為僱主屋企地方細，無地方畀佢哋瞓，屈喺廚房某角落，覺得佢哋好慘，於是諗到起個宿舍畀佢哋住，僱主唔需要為屋企細而煩惱，家傭亦有自己嘅天地。
每個床位連水、電雜費月租九百蚊，最少租一個月。發展商話呢批床位只有業主先可以租，否則以咁嘅價錢，分分鐘供不應求。
唔少中國人都篤信風水命理，上環普頓臺請嚟風水大師楊天命，幫買家入伙嘅時候睇風水，噚日重請埋楊大師到場，即席講吓普頓臺嘅風水。
佢話過咗○四年二月四日立春之後，香港運勢就會西移，所以建議買家要過咗呢個日子先至好搬入去。最好風水嘅單位，就係坐西北向東南嘅C室。楊天命重話，自己係上環街坊，細細個就喺附近住，以前重喺碼頭幫人搬過貨。
楊天命話，過咗立春之後，地產市道會復甦，到○七○八年升勢最勁，𠵱家係時候入市。佢話自己其實好想買樓，不過因為職業問題，銀行唔借錢，搞到買唔到樓，就連信用卡，都申請咗三年先至有卡用。
樓市好景，用家同投資者都積極物色物業，泛海國際執行董事關堡林透露，佢哋嘅收租物業收到唔少租客查詢，問可唔可以買自己租緊嘅單位，其中最多查詢就係北角商廈華匯中心。
關堡林話，公司唔排除出售華匯中心嘅連租約單位，但價錢要求要有相當於七厘回報率至考慮割愛。
華匯中心喺九七年落成，泛海已經賣出大部份單位，𠵱家只係持有少量作收租之用。
每一年都有咁多新盤開售，要改個又好聽又好記嘅名真係幾難，九建羅汝榮為咗幫九龍城食為先項目改名，已經諗咗好耐，周不時問吓傳媒朋友有咩好提議。
佢哋最近決定廣邀公司同事畀意見，內部出咗通告，搞咗個命名比賽，勝出者可以獲贈一千股九龍建業嘅股票，以噚日每股五個七計算，都有成五千幾蚊。
羅汝榮重話，法文、葡文、英文一樣得，暫時只限內部員工參加。九建樓盤向以「采」字行先，唔知改番「采」字頭機會係咪大啲呢？
蘭西
電郵地址：