車路士嘅油王班主阿巴莫域治呢排好心煩，球隊近仗連接輸波不特止，佢喺車路士球會總部嘅辦公室喺星期一亦遭爆格。
班賊真係神通廣大，佢哋竟然可以避開晒車仔總部森嚴嘅保安同埋閉路電視，但只係偷咗幾部高級行政人員嘅手提電腦，包括油王嗰部，其他嘢就郁都冇郁過。連調查今次事件嘅警察都話：「賊人好專業，而且只係偷電腦，好明顯係有目標嘅！」咁嘅情形令我諗起水門事件。
阿巴莫域治梗係好嬲，但佢話唔知班賊嘅目的。計我求大俠話，阿巴莫域治之前俾俄國政府調查，呢啲唔通係俄羅斯秘密警察嘅所為？而且，保安咁森嚴都俾人偷到嘢，唔通好似《無間道》咁，車仔有內鬼？
柏林哈化喺德甲上半季踢得好差，𠵱家排喺尾二，下半季要為護級而戰；哈化高層為咗懲罰班球員，諗住減佢哋人工，其中匈牙利中場戴達就表示冇異議。咁又係，多蒙特出唔到線踢歐冠盃分組賽，佢班球員即刻要減薪；哈化咁淪落又係減薪，試問佢班球員又點敢SayNo呀！
德甲聯球會史特加雖然保唔住個冬季冠軍，重要跌落第四位，但佢哋班球員就逐個威威。繼德國門將希迪布蘭打破簡尼嘅德甲最長時間不失球紀錄，同埋薩碧斯攞咗匈牙利足球先生之後，希比亦當選今年白俄羅斯足球先生。佢班球員咁掂，唔怪得之成為歐洲其他大球會嘅獵物啦！
啱啱幫小保加攞咗洲際盃冠軍嘅阿根廷前鋒舒洛圖，極有可能喺明年四月加盟中國大連實德。球迷或者會奇怪，堂堂一個球星點解會去大陸踢波，但原來實德老細徐明同歐洲好多大會關係好好，重同曼聯、曼城同慕尼黑1860等連晒線；𠵱家佢連南美市場都撈埋，真係勁呀！
前日馬刺趁速龍中鋒巴特爾隨隊作客聖安東尼奧時，送咗隻大巴最夢寐以求嘅冠軍指環畀佢，上面重刻咗大巴個名；大巴諗住畀啲國內記者影幾張相威番吓，點知隻戒指太大，大巴一帶上去就跌番落嚟，睇嚟係生產商冇按照大巴嘅手指大細嚟打造，搞到大巴冇晒癮！