為咗遷就《22世紀殺人網絡》嘅第二、第三集上映，同埋有多些時間製作，電影公司特別安排哈利波特第三集《阿茲卡班的逃犯》喺下年六月四日先公映，不過如果有fans真係等唔切嘅話，下年春天《阿茲卡班的逃犯》嘅電視遊戲就會推出，大家可以玩住等。
呢隻由ElectronicArts開發嘅遊戲，故事同原著小說嘅情節一樣，幾位主角哈利、妙麗同榮恩第三年喺霍格華茲魔法學校讀書，但係今年又有一個不速之客造訪魔法學校，佢就係由阿茲卡班監獄走出嚟嘅犯人天狼星布萊克。
講開呢部超過十億港元製作費嘅《阿茲卡班的逃犯》，基本上已經差唔多搞掂，𠵱家主要做後期製作，但係班小演員其實都冇乜時間唞，因為第四集《火盃的考驗》已經準備喺下年四月開鏡。我羅拉記得已經十四歲嘅哈仔丹尼爾拉德克利夫（DanielRadcliffe）曾經俾人話冇得拍，但近期又有消息話佢連○七年上映嘅第五集《鳳凰的命令》都簽埋。