一位女讀者，署名家庭主婦來函，請左丁山介紹廠商及有關資料，畀佢位公子回港求職。坦白講，恕難照辦，本欄只提供一啲大趨勢，求職環境，唔想介紹讀者求職，否則脫離寫稿嘅基本功咯。話時話，假如肥佬黎肯增設搵食版、做求職中介，今時今日應該有讀者睇。
另一位讀者Roger來電郵話平時有睇《蘋果》，但一直冇理會名采副刊，喺十二月十二日無意中裝兩下（大概標題吸引啩），睇到左丁山專欄，認為有意外驚喜。Roger係純數學研究生，預備到美國讀博士，以前去過銀行求職失敗而回，以為銀行一定要請會計系畢業生，睇完本欄講馮孝忠，先知道未必係咁簡單。
既然係問馮孝忠，不妨答吓。馮孝忠（AndrewFung）係星展銀行財資部董事，負責債券外滙等工作。星展銀行嘅香港最高負責人黃鋼城本身係外滙高手，與梁錦松同期，馳名香港、新加坡外滙界；星展財資部主管、馮孝忠嘅上司，張宗永亦係外滙高手。三位仁兄在陣，星展銀行自然注重財資外滙方面嘅業務。以前做外滙，主要係炒滙水坐盤，現時就大量利用衍生工具，搞對沖，發展新產品，無本生利，於是乎需要精通數學嘅人才，利用諾貝爾獎經濟統計學大師發明嘅計量財務模式嚟策劃計算。咁咯喎，會計系學生、普通經濟學學生就未必識得咯，所以銀行就索性聘用數學博士，Roger想知道多啲，不妨寫信去星展向馮孝忠問吓！