好耐冇炒過嘅泳衣股德發集團（928），噚日公布截至今年9月底止中期業績，表現唔差。早兩個月前睇淡此股的經紀黃，終於轉view，重話沽壓相信已消化得七七八八，可以睇番好。
德發今次中期業績，盈利4312萬元，比起去年同期上升17.5%，中期息派0.9仙，以一隻工業股嚟講，其實已算唔錯，對得住股東有餘。
經紀黃話，早兩個月前唔睇好德發，主要係因為策略性股東裕元集團（551），當時趁高沽清所持股份，而之前傳聞的合作計劃，睇怕亦凍過水。
其後德發發行另一批金額3120萬元的可換股債券，由於市場估計換股價唔慌高，所以德發雖然有強大的芬佬股東背景支持，但股價始終在0.80元水平窄幅上落。
不過，已經過咗咁耐時間，該批債券應該行使咗唔少，而要沽貨者，相信亦已沽得七七八八，加上公司中期業績見得人，要炒高應該唔太難。
德發昨日跌1.2%，收0.82元，成交股數449.6萬股，金額373萬元。
慕容小初