無綫今年力捧一班新人上位，曾主演《英雄、刀、少年》的黃宗澤及在《律政新人王》表現出色的陳鍵鋒，近日與李彩樺（阿Rain）合演古裝劇《我師父係黃飛鴻》，陳鍵鋒還笑阿Rain一日食到黑，食量驚人。
無綫近年缺乏小生及花旦接班人，所以今年力捧一群年輕小生、花旦，開拍一套接一套的青春劇，讓他們早擔大旗，例如最近一套古裝劇《我師父係黃飛鴻》，由新人黃宗澤、李彩樺、嘉碧儀和陳鍵鋒擔正演出。
李彩樺連續接拍《我》及《彩虹橋》兩劇，她表示均遇到志同道合、又玩得的演員，她說：「兩套劇都係好多後生仔，所以拍得好開心，呢套劇我做一個男仔頭，同班男仔玩得好開心。今個元旦會去無錫拍呢套劇外景，我諗住同成班工作人員開個花火會，元旦一齊放煙花。」
曾擔演《英雄、刀、少年》的黃宗澤及在《律政新人王》演靚仔律師的陳鍵鋒，今次在《我》劇有份做男主角，當然很開心，但是換來的代價是不眠不休。
黃宗澤說：「平時我紮紮跳冇時停，成日整蠱阿Rain，不過阿Rain本身都係一個搞事精。但係呢一排要趕戲，成兩日冇得瞓，真係好攰。」
而陳鍵鋒拍此劇時則覺得很好玩，他說：「成班後生仔好開心，日日都嘈喧巴閉，嗰個大食Rain，一日食到黑，佢真係好大食，零食、糖、薑同蛋糕乜都食，連成個飯盒都食得落。」
陳鍵鋒續說：「有時同台食飯所有男仔食完，佢重喺度食，真係好得人驚，佢真係唔怕肥。」
採訪、攝影：楊潔雯
