王從希今年將度過加入娛樂圈後的首個聖誕，原來她已接下多個商場騷，好讓自己過一個豐收佳節。王從希談到近日跟黃宗澤的緋聞時，表示他倆只是好朋友，並坦言自己已有親密男友，更會與對方共度聖誕，交換禮物。
落選港姐王從希昨日穿上聖誕女郎服飾在將軍澳拍照，吸引不少途人圍觀，有巿民更大讚她靚女，她聞言開心不已。原來王從希今年將在工作中度聖誕，她說：「我之前接咗好幾個商場騷，現階段都想賺多啲錢傍身先。」
近日有傳王從希跟無綫力捧的新人黃宗澤拍拖，她無奈地說：「其實我哋嘅緋聞唔係真，我哋只不過合作做過節目，佢知我係新人，幕前經驗少，所以好照顧我，而且我喺娛樂圈朋友唔多，啱傾咪傾多幾句囉。」問王從希對黃宗澤的印象怎樣？她說：「佢好友善，好好人。」
王從希又坦承已有親密男友，那她今年有否時間跟男友過節？她說：「我諗做完嘢先，我都會買份特別啲嘅聖誕禮物同佢交換，等呢幾日忙完先買。」
王從希又表示已把聖誕禮物寄給身在加拿大的母親和父親王偉，她說：「雖然𠵱家有男朋友，但喺我心目中，始終親情重要啲，而且我又啱啱入行，暫時都想將工作做好先。」
採訪：比華利
攝影：何國豪
場地提供：將軍澳新都城中心
