立法會最後一日會議唔見咗涂謹申，原來佢應歐盟邀請，去咗歐洲訪問，聽日至返香港，同屋企人過聖誕節。
阿涂同八方講，布魯塞爾同斯特拉斯堡都好凍，只有零度，搞到佢啲鼻敏感都出晒嚟。
佢重話前日喺歐盟國會聽應否撤銷武器禁運予中國嘅辯論，嗰啲被傳俾軍火商施壓嘅國家好似法國同德國嘅代表，講反對特別大聲，好似想劃清界線，佢哋話中國𠵱家唔係需要武器，而係要做生意，又講得好啱聽喎。
至於好多代表以台灣搞緊民主化，大陸靠嚇唔肯放棄武力攻台嚟做反對原因，阿涂都覺得有趣，所以話，鬼佬睇嘢始終唔同啲。
阿涂最鍾意睇間諜小說，呢鋪中聯辦承認捉到通番賣國嘅內鬼，佢唔喺香港，真係錯失良機。其實許家屯當年都話叫大新華關門收皮，佢哋又偏偏唔聽，咪搞出個大頭佛囉。
傳真︰2623-9278
電郵︰