國家輸血揼水，人工呼吸嘴對嘴，終於救番少少特區。「屍爬」自由行，導致失業率大幅回落半個百分點，創沙士疫後歷史性新低，百分之七點五。
有樂觀人士即時跳出，大呼今次唔係虛火，而係真嚟料，並預測明年失業率會回降至百分之六㖭。若然係咁，就唔止國家要加重揼水力度，重要靠美國政府繼續發威，活捉侯賽因之後，再生擒拉登，兩大魔頭，梟首示眾，一個掛喺自由神像，一個掛喺金門大橋，恐怖勢力全面潰敗，正氣伸張，美國經濟大幅反彈，落多啲定單，香港先至有得生。
唐唐今次尚算清醒，佢話，香港經濟結構性轉型，重未成功，尚有挑戰。冇錯，失業率回落，係中國直接施用人海戰術，叫啲大陸人民搬水落嚟，自由行塞窿填氹，呢一招，黃河決堤，咁多年亦一直用，組織軍民，用血肉之軀抵抗洪水，大陸同胞直接搬錢落嚟救市，加埋國壽掛牌，明年一月一日「屍爬」大落實，國家排洪救旱，真正可歌可泣。
不過，阿董所講嘅高科技知識型經濟，又或者中藥港呀咁，就一樣唔使諗。因為自由行救嚟救去，只係飲食零售酒店服務業，係面嗰浸，香港中產階級，冇乜得益。
想真正解決經濟衰退，國家惟有推動二○○七年特首直選。民建聯救亡轉軚，輸到懵晒，連阿董都照插。中產階級需要一個利益代表嘅政黨，陳方安生披褂出征，萬眾矚目期待。
一定要令香港人覺得改變在望，前景在我手，悶局有破冰嘅可能，先至可以有信心。信心轉化為商機、消費動力、學習新技能嘅毅力，加埋外資睇好，全面湧入，港人治港，有名有實，方始可以根治衰退。
余若薇、梁家傑等人直選，帶動中產階級全面參政，下一步陳太再蒲頭，先至水到渠成。商家支持，中產階級托撐，全港形成共識，先至可以同北京中央講數。現時條件，未完全成熟，只要全民團結，中產階級堅持訴求，冇乜嘢事，係唔可能。
胡溫都話，執政以民為本，香港可以民主先行。陳太又唔係反革命，點解中央唔可以容納？有消息人士話：今次中央高調宣布中聯辦蔡小洪間諜案，就係畀中聯辦少少顏色。本來，家醜不外揚，自己人做咗英美間諜，多數係低調調返大陸，絕少先放料，後高調證實。
請曾慶紅副主席直接聽香港民意，排除土共干擾，○七普選，經濟好轉，一人一票選特首，橫財就手。
（圖）失業率下調，對特區政府嚟講真係可喜可賀，但對普羅市民似乎都冇直接受惠喎，民主黨成員噚日就繼續為民請命，到政府總部抗議。
傳真︰2623-9278
電郵︰