曼聯快翼傑斯應歐洲足協嘅要求，選出佢心目中嘅歐洲夢幻陣容，但就認真唔畀面，一個曼聯現役球員都唔揀，重飛埋碧咸出局。
傑斯挑選嘅歐洲夢幻十一人，除咗亨利同馬基列尼，其餘唔係踢意甲就係西甲球會；或者係為咗公平起見，佢至冇揀到𠵱家打緊曼聯嘅球員。另曾經同佢好friend但之後翻咗臉、今屆過咗皇馬嘅碧咸，佢亦都冇揀。
雖然傑斯冇解釋點解唔揀碧咸，但就話：「碧咸同我講，淨係睇施丹練波已大開眼界。」碧咸雖然好頂級，但如果佢講得出，證明佢同球王級球員重有少少距離，傑斯唔揀佢都好正常。另外，老實講邊個人唔記仇呀，話晒佢同傑斯唔妥，所以想入選傑斯嘅陣容，真係唔使諗！
歐洲波大放冷氣之際，西班牙盃就熱門當造。除咗衞冕嘅馬略卡同桑坦德爆冷畀次級球隊踢出局之外，其餘對次級球隊嘅九支西甲球隊，都可以喺九十分鐘內作客贏波過關，算係應驗咗日前「瞭望台」《西甲強隊盃仔睇高啲》嘅預言，所以以後不妨去繼續瞭望一吓啦。
國米官網最近開發咗泰文版本，喺意大利球會嚟講都幾新鮮，搞嘢。原來國米已經同一間泰國上市公司建立夥伴關係，未來會喺泰國大搞宣傳。以往意甲球會喺其他亞洲國家推廣唔算太理想，國米擺明想喺足球狂熱、賭波風氣勁嘅泰國殺出血路。唔知國米遲吓會唔會簽件泰仔呢？
其實今季啲盃仔都唔係一定不利大球會，好似意大利盃咁，強隊甚至可以靠運氣贏你！話說國米周中作客里賈納打意大利盃次圈次回合，就係靠對方門將比拉迪對腳，將前鋒告魯斯喺完場前一次射門中柱後，將個波撞咗入網成一比一晉級！你話唔係靠運氣係乜？
呢兩個禮拜都可謂傳統勁旅嘅難過日子，突然間成個球季都已經冇晒目標咁！好似阿積士及馬賽，上周中喺歐冠盃分組賽包尾出局，連足協盃都冇得爭；到周中又同時喺國內盃賽出局！阿積士都叫做好啲，重可以爭聯賽；馬賽就喺聯賽失分太多，分分鐘又係一個四大皆空嘅球季！