日本少男組合w-inds喺本地大受歡迎，唔少賣日本偶像物品同明星相嘅舖頭，都擺晒w-inds嘅精品、月曆同海報做鎮店之寶，搞到啲尊尼仔失晒威。
今年夏天w-inds搞嘅「Thesystemofalive」巡迴演唱會，入場人數近十四萬人次，當中有唔少本地fans特登去日本捧場，不過去唔到嘅fans唔使失望，因為呢個騷最近出咗香港版VCD，入面除咗可以睇到w-inds三位靚仔勁歌熱舞之外，亦收錄咗好多珍貴嘅片段。
w-inds三位成員開騷前喺後台好認真綵排，而成員千葉涼平亦覺得自己嘅肌肉愈嚟愈硬淨，重識得倒立行㖭。
不過w-inds亦有鬼馬嘅一面，好似涼平喺後台攞住水槍狂射惡犬，好怕熱嘅緒方龍一就鍾意紮辮仔同赤膊周圍走，至於經常擺出憂鬱情聖樣嘅主音橘慶太，就喺臨出騷前玩徒手劈冰，點知打極都打唔爛，佢即時扮鬼臉遮醜！