中國通訊社正式公布，中聯辦前秘書長蔡小洪，因為向西方國家出賣情報，犯咗間諜罪行，現正接受審查。
蔡小洪雖然對香港人名不見經傳，不過喺中共黨內，佢家世顯赫，就係王穎妤小姐所形容嘅BlueBlood（呀，唔係，共產黨係赤色嘅，所以應該係RedBlood至啱）。蔡小洪佢令尊翁，名叫蔡誠，曾經追隨中共特務之父周恩來搵食，並接受港澳辦祖師爺廖承志領導，長期喺國民政府時代嘅上海做特工，正所謂「根正苗紅」。
中聯辦秘書長，對內管理組織人士，對外亦眼觀四方。亦即宮廷大內總管。冇番三代審查，共黨又點會放心，連蔡小洪呢亭正牌共幹，都做咗西方國家嘅間諜，並斂財五六百萬，都咪話唔好笑。消息傳出，中環一批紅酒鋸扒族，紛紛私語。有啲口痕友話：嘩，共黨愈畀心機栽培嘅，就愈係無間道，咁阿董又有冇機會係西方國家嘅卧底呢？
因為，阿董最初由肥彭親自提拔，擺佢喺行政局，栽培咗五年，以肥彭咁眉精目企，冇理由唔知道阿董嘅常識有幾多斤両。有乜理由中方當初由肥江握手欽點阿董，肥彭等英方官員齊齊稱讚，話係深慶得人？六年幾以來，阿董有本事將香港嘅帳面資產蒸發咗成三萬億，親手宰殺呢隻金鵝，尤其係將肥彭遺留嘅「母語教學」毒藥政策加大力度去推，搞到特區英文低落，斬斷同國際之間嘅紐帶。如果搵長毛做特首，都冇阿董咁超勁殺傷力。
蔡小洪都做得西方特務，證明西方國家滲透我國，真係無所不用其極。佢收現金五六百萬，但中國高層好多領導人啲仔女，喺美國擁有房地產，美金戶口有幾多錢，無從稽考。點解國家加入世貿，接受晒美帝屈辱性嘅條件，好似香港面對迪士尼貼大床送土地一樣，呢啲決策嘅背後，有冇涉及官員出賣機密及國家權益？中通社消息又加多句，喺7.1之後，西方國家加強對香港嘅「徵募、竊密」工作。「徵募」兩字，真係可圈可點。民建聯自從馬主席上台，好似有少少轉軚，女骨幹陳婉嫻，更在港台節目瘋狂反董，誣衊阿董，話佢係專炒公務員嘅劊子手，激到愛國時評家梁立人即日痛斥，質問佢點解7.1之後咁反董？又話若非老董，民建聯何來今日地位，人哥話陳婉嫻忘恩負義，令人「毛骨悚然」。
唔怪得國家嘅說話，意有所指。西方國家招募死硬反中分子，7.1前已經招募晒，7.1之後，主要目標，就梗係喺思想上對國家同阿董都極之不滿嘅民建聯。蔡小洪咁革命，都做咗西方特務，民建聯咁左，一旦反董，又點會唔令祖國懷疑，係咪俾西方徵募晒，變咗西方嘅特務巢穴？
傳真︰2623-9278
電郵︰