梁朝偉日前至同女友劉嘉玲開開心心去尖沙嘴食日本料理，慶祝佢攞影帝之餘，亦順道為偉仔嘅老友吳廷燁慶祝生日，點知隔咗一晚，呢位出爐金馬影帝唔知係咪呢輪忙開工，所以喺夜晚凍冰冰嘅天氣下，一條友都要走去跑馬地食蠔。不過，馮仁昭都聽講過男人食蠔好滋補㗎！
前晚八點，偉仔揸住嘉玲架平治，走咗去跑馬地奕蔭街嘅OsyterExpress食蠔，直至九點幾，偉仔就離開蠔店，但佢就冇乜表情，重邊行邊休褲，一直行到路邊攞車，之後佢就揸車返咗屋企，唔知嘉玲會唔會喺屋企等佢返嚟呢？
偉仔前晚食完蠔之後，噚日佢又去咗尖沙嘴嘅CEONeway，同董潔為電影《地下鐵》做宣傳，偉仔話佢同楊千嬅會為電影唱主題曲《星之碎片》。對於有報道再傳佢同劉德華為爭金馬獎而不和，偉仔就一派話之你神色，佢話：「重講呀？悶唔悶呀？我都覺得悶喎，都完啦，重講呢啲嘢，不過花邊新聞冇所謂啦。」
杜汶澤女友田蕊妮（大塊田）日前為商台《雲妮鍾情》擔任節目嘉賓，大塊田話好鍾意由盧巧音唱嘅《三角誌》，因為呢首歌會令佢回憶起唔開心嘅事，首歌嘅內容係講一段三角關係，而咁啱大塊田又同樣有咁嘅事發生，所以每次去唱K，都會喊到收唔到聲。
無綫日前喺節目《娛樂大搜查》中，播出金馬獎得獎者片段，惟獨冇提影后吳君如，即惹嚟各方批評，外事部助理總監曾醒明噚日話：「我承認冇刻意搵君如，因為佢同第二個電視台有約，呢啲一向係無綫作風，攝製隊只可以作場外採訪，製作單位TVBS又唔能夠提供片段，但絕冇封殺。」
張栢芝前日去咗北京同陳凱歌傾拍《無極》套新戲，喺部戲入面，佢會同韓國小生張東健、日本型男真田廣之合作，栢芝經理人李小姐話：「之前陳凱歌嚟香港搵栢芝，但栢芝忙緊拍賀歲片，所以大家冇見面，呢排栢芝得閒，咁咪抽時間去拜會對方，如無意外雙方合作成數相當高。」希望栢芝返內地拍戲嗰陣唔好咁躁啦！
啱啱先被踢爆同陳容森假分手嘅張可頤，噚日又有周刊影到佢同舊愛董波喺街頭嘅熱吻照。張可頤同陳容森成日鬧情變，有話張可頤係為咗事業，而與陳容森玩地下情，不過今次張可頤趁住男友出埠公幹，同舊愛喺街頭親熱，未知陳容森睇到之後會唔會嬲到鬧分手呢？
