前晚場英格蘭聯賽盃八強戰直播，西布朗主場對阿仙奴出現罕見場面，球證及旁證都先後有傷，幾乎唔夠人執法！
由於助理球證馬斯半場時受傷，正當有關人等着急之際，好在另一超聯球證加拉查有份入場睇緊波，即時落場幫手頂檔；到六十分鐘，主球證美錫斯竟然抽筋，自行走去搵主隊西布朗嗰邊軍醫「捽捽」隻腳，我求大俠真係驚佢俾人打跛！事關上半場西布朗奧干納入波被誤判越位在先，跟住又有阿仙奴基昂幾次喺禁區內毛手毛腳，但美錫斯都好似睇唔到咁，無畀到西布朗十二碼！
話時話，阿仙奴個新仔艾利亞迪里好似幾好波咁，又有運，出親都有波入，睇嚟大把前途。
效力浦和紅鑽、巴西前鋒馬斯奧艾馬臣，日前就當選日本聯賽的MVP，佢只得二十二歲兼潛質優厚，日本國家隊當然想打佢主意申請入籍，成為另一個「三都主」。由於佢以前入選過巴西十九歲以下代表隊，得唔得重要睇國際足協，但係我求大俠就覺得有「打茅波」之嫌！
曼聯後衞李奧費迪南缺席藥檢即將受處分，球圈中人有啲話佢抵罰停賽，有啲又話應該畀個機會佢！我求大俠就無謂發表意見嘞，但聽到前韋斯咸領隊哈利列納都係話要罰，就略見端倪！話晒李奧當年喺韋斯咸，就係哈利帶佢出身；𠵱家連恩師都話要罰，睇嚟李奧真係有問題喎！
朗拿度同韋利好老友人所共知，「哨牙仔」擺明唔妥國米教練沙哲朗尼最近將韋利貶做後備，於是寸老沙無厘頭，又話知道𠵱家國米氣氛好差喎。我求大俠覺得「哨牙仔」口口聲聲話好關心國米，但周不時又講啲損害國米士氣嘅言論，一定會有反效果，不如收口罷啦。
失意於維拉嘅克羅地亞前鋒巴拿班，一心諗住加盟意甲安玻里從頭嚟過，早排好決斷咁同維拉解約。殊不知安玻里外援名額爆咗，會方想趕走嘅加納中場拉沙克又賴死唔走，搞到巴拿班加盟安玻里隨時觸礁。佢一心轉工可能變成無飯開，都咪話唔坎坷。