寶島噚日發現一宗沙士個案，確係令小初嚇咗一跳，雖然只係在實驗室中招嘅單獨個案，但在心理上的確有影響，加上批股集資傳聞此起彼落，小初決定減持，避一避鋒頭。
就連小初在月初睇好，覺得可以短炒業績的遠東發展（035），因為股價突然大幅回落而沽咗，但經紀黃就唔肯沽，覺得隻股跌得過份。
遠展由月初的1元水平起步，炒過上去最高1.42元，噚日公布中期業績，雖然盈利比去年同期勁升4.6倍，有成4256萬元，兼夾有中期息2仙派，但偏偏股價就倒插，最低見過1.17元，收1.20元，大跌12.4%，成交金額高達6179萬元。
經紀黃話，雖然有人喜歡趁好消息出貨，但唔好忘記遠展今時唔同往日，有唔少芬佬坐住貨，而佢哋嘅入貨成本亦唔係平，冇乜理由好似莊家股咁，消息出完就大散，加上年尾流流，芬佬要做櫥窗粉飾，其實應該趁大跌時買入博反彈。小初雖然冇貨在手，但亦希望經紀黃冇估錯。
慕容小初