八方噚日晨早去睇荔景荔灣花園「宣美兒童園地」開幕典禮，間兒童中心係畀聽覺有問題嘅小朋友早啲接受訓練，以求「聾」而不「啞」。
中心贊助人係恒隆集團同香港靈合堂，負責人鄭從本醫生話中心所在地係恒隆物業，得恒隆董事總經理袁偉良協助，同恒隆主席陳啟宗嘅慷慨，所以月租只係十蚊，裝修同其他費用就由新地老細郭炳江掏腰包，「不過郭生唔想出名，所以就用教會名義」。
郭炳江同袁偉良噚日重一早到場，重帶埋旗下帝苑酒店嘅糕點同公仔做聖誕禮物，班小朋友亦好識做，大大聲講「多謝郭叔叔」。
講開郭炳江，原來佢對詩姐高招放過阿松，大為讚賞。佢勁讚政府處理得非常好，律政司跟足法治精神，徵詢過兩位資深大狀，最後重公開埋法律意見，見唔到有政治因素，重要嘅係，連大律師公會同一啲資深大律師都話滿意，所以呢件事好值得港人驕傲喎。
傳真︰2623-9278
電郵︰