港股連跌3日，噚日又係利淡消息控制大局，恒指一度跌到12100水平，最低潮時，恒指下跌149點，由本周一的高位12741回落，已有630點，猶幸在50日線（12143）水平獲得支持，尾市回升到12193收，僅跌67點，期指高水2點。
大市噚日本來受惠美股造好而高開，但未幾傳來台灣發現沙士，行情立即掉頭急挫，旅遊概念股更首當其衝，其後台灣證實為實驗室感染個案，並無擴散至社區，行情才由低位回升。香港經濟已經有轉機，真係求神拜佛，沙士唔好再出現。
跌勢雖然未止，但芬佬對後市仍然好有信心，綜合佢哋嘅意見，今次港股借中銀（香港）（2388）大型配售而引發跌市，係正常的技術性調整，回落幅度有幾深，暫時仍未能確定，但唔排除噚日的12111會係調整的低位，整固完成後，恒指可再向高位推進，明年首季目標仍係13500至14000。
中銀大股東一次過抽走過百億元，令投資者憂慮大公司「披成」會陸續有來，而市場傳聞的對象就有中國移動（941）、中國鋁業（2600）、新地（016）同江西銅（358）等。中鋁噚日下晝已澄清，由於市場波動太大，短期不會進行配售，消息一出街，股價立即由低位反彈，一路掃到收市，高收5.35元，升0.3元，成為噚日表現最突出的國企。至於江西銅，由於正尋求股東授權，短期內亦唔會有行動。
中移動已宣布，進行最後一次注資，同母公司磋商收購餘下10個省市移動電話網絡，涉及資產的股本連債項約值60億至80億美元，由於有關交易最快都要4至5個月才能落實，因此公司暫時未有制訂任何融資計劃。
芬佬看好港股後市，恒指要見14000，滙豐（005）同中移動呢兩隻重磅股，肯定要成為主力催谷對象，芬佬心目中的目標價，滙豐係135元（預期升幅14.4%），中移動係27元（預期升幅18.1%），而預期恒指升幅係14.7%，因此，在未來的升市中，中移動預計會有較強勢表現。
近兩個月，中移動形成圓底型走勢，短線阻力24元，升破後可見26.5元。
郭兆誠