中國銀行突然配售中銀香港（2388），抽水約147億元。有消息話呢批股份獲超購6-7倍，大部份芬佬只獲得認購額的10%左右，即係話唔少芬佬可能要在二手市場吸納。但黑客聽到個唔知真定假嘅古仔：有人收起啲貨唔畀基金，待復牌後「有秩序」喺二手市場沽出。中銀香港噚日復牌，未曾跌破過配股價，全日在13.75元以上徘徊，收市報14元，跌10.25%，成交196億元。
一如所料，配股傳聞四起，傳到連一向自稱大把錢嘅和黃（013）亦傳配股，令到港股一度跌破12200水平，全日收12260，跌259點。中國鋁業（2600）傳話試盤批股，股價挫8%，收5.05元。
花旗美邦對中資金融類股份潛在供應的憂慮，實在值得關注，除咗中銀可能再沽多15%中銀香港外，四大國有銀行將陸續上市，民生銀行亦在籌備中，屆時資金不愁冇出路，芬佬手上銀彈可能會hold住，將令大市承接力銳減。
近期新股上市，在掛牌前夕其他已上市的同類股差不多例升，中國人壽（2628）明日掛牌，人保財險（2328）噚日逆市上升5%，收報3.175元，完全不受大市急挫影響。據聞今次配售，好多芬佬一股國壽都分唔到，一係就等國壽掛牌後買入，或者買住人保財險止吓咳。
紫金（2899）與江銅（358）屬同類股，江銅噚日一度急升4%至3.925元，但好快就打回原形，收報3.775元，冇起跌。江銅走勢對紫金有一定參考作用。
阿 虎