經紀黃品題的紡織股繼續造好，尤其係魏橋紡織（2698），包括保薦人在內的多間證券行唱好下，股價終於衝破多個月的悶局，噚日逆市升3.2%，收9.65元，睇嚟真係10元在望。
經紀黃話，除咗紡織股外，另外一隻生產女性衞生用品的恒安國際（1044），股價走勢愈來愈好，噚日創出4.10元的歷史新高。
早排恒安曾安排一班證券界人士上福建睇廠，之後就陸續有報告發表，而芬佬則密密咁吸貨。不過，今次投資者睇好恒安的原因，唔係因為衞生巾賣得，而係嬰兒尿片好賣，同埋年中向大股東收購的紙巾廠，銷售情況理想所致，所以恒安股價家陣雖然處於高位，但個勢並不危險。
另外，經紀黃又話，繼前日中銀香港（2388）唔聲唔聲批股，嚇大家一驚之後，市場又傳聞有銀行股打算批股，當中傳得最勁，就係工銀亞洲（349）。早前有分析員按資產負債比率估計有乜股份可能會抽水，當時工銀亞洲亦榜上有名。
慕容小初