雖然下個禮拜至係聖誕節，但係曼聯班波已經喺上個禮拜六晚開聖誕派對，單計飲香檳已經用咗七萬八千鎊（約一百零五萬七千港元），結果飲到醉醺醺嘅包括有基斯坦奴同史高斯，重俾人影到個醉貓樣……不過我求大俠就認為佢哋今次冇乜唔妥。
大家都知道，啲球員比賽場數多兼激烈，咁啱曼聯贏咗鄰會曼城，又唔使踢周中聯賽盃，唔放鬆吓真係對唔住自己！
今次曼聯提早狂歡其實亦有後着，因為由二十一號打落至二十八號八日曼聯有三場聯賽，其中兩場作客熱刺同米堡，唔易打㗎；反而阿仙奴三場波之中，有一場係迎戰弱隊狼隊，相對地比較有利。所以希望曼聯提早happy完後就修心養性，有助佢哋力迫阿仙奴。
國米前鋒韋利上場聯賽對博洛尼亞被貶為後備，早兩日就話對「足球無晒熱誠，計劃好退休後走去打板球……」查實佢始終係意國頂級前鋒，重有排玩，使乜講晦氣說話？小小苦楚等於激勵，佢應該學老友迪比亞路咁，被貶後備唔緊要，一有機會落場就入波。
前晚收費台播FIFA頒獎禮，老實講個騷本身都無乜噱頭（睇女主持個樣，真係學傻強話齋：「瀨嘢」），但能夠睇到朗拿度喺台上蹺埋手無咩儀態、施丹為朗拿度繙譯有少少尷尬、佢兩個同埋亨利着嘅老西風格迥異，都幾過癮。球星喺球場外嘅一面，球迷多多都受。
轉會市場喺一月先重開，但有間英格蘭球會已有所動作，但唔係超聯球隊，而係英甲榜首西布朗。佢哋已向曼城同埋韋根開咗價，一口氣買兩名前鋒赫格比同賀斯菲特，而兩間會都已初步接受咗西布朗嘅開價。西布朗今屆人腳唔差，重咁豪氣擴軍，睇嚟對升番上超聯志在必得。
早兩日NBA嘅網隊慘敗畀灰熊47分，身為隊中領袖嘅傑特可能火都嚟埋，故當日傳媒喺佢哋嘅更衣室外面聽到球員間吵鬧聲，當中重夾雜粗口㖭；網隊今季嘅成績走晒樣，𠵱家重出現內訌，照我求大俠估計，下個被炒魷嘅教練都應該係向來同傑特唔妥嘅史葛囉！