香港興業不斷有「新思維」，繼東涌藍天海岸後，佢哋嘅重點發展區愉景灣，新形象噚日隆重登場。新標誌叫做「DbAY」，即係愉景灣嘅英文名DiscoveryBay，藉此建立新品牌。
DbAY嚟緊會首先以兩個主題推出第一輯廣告，以外國雜誌為藍本，廣告相設計成雜誌封面。其中一個主題係「EdenDiscovery在香港伊甸樂土」，廣告相係一個女模特兒扮演「夏娃」咬蘋果，用嚟介紹愉景灣嘅生活環境好似樂土。另外一張相嘅主題，就圍繞建築。
香港興業陳子明話，愉景灣已經發展咗好多年，所以要搞個新形象，迎接嚟緊嘅樓市升浪，希望愉景灣可以帶畀大家年輕嘅感覺，吸引多啲後生嘅中產階層同內地客買樓。
經濟好轉，唔少人都相信明年嘅樓市會好過今年。但原來風水學有云，下個禮拜一開始，即係「冬至」嗰日，香港開始行為期二十年嘅「八運」，呢個運同以前嘅七運唔同，風水會大執位。唔少富豪買樓都會搵堪輿學家去幫手睇風水。
有堪輿學家話，踏入「八運」期間，最緊要係移動，即係可以搬遷嘅就搬遷，買樓換樓都可以，唔打算換樓嘅業主，可以考慮大事裝修間屋。
而「八運」會先旺西南面，見到水嘅物業就更加好。聽行內人講，南區淺水灣一帶部份以前空置嘅物業，近排頻頻見到做緊裝修，唔知係咪知道出年西南位好，所以快啲搬入去住呢？不過，風水學呢樣嘢，信不信就自己決定。
美聯全新一輯「萬馬奔馳」電視同報章廣告啱啱出街，就鬧出雙胞胎，利嘉閣地產都登咗一個好相似嘅報紙廣告，美聯物業集團顧問黃錦康，噚日要聯同謝家靄律師，開記者會聲討，又發表聲明話，保留一切法律追究權利，有關事件亦已交由律師處理。
黃錦康話，對於同業利嘉閣地產喺報章刊登與集團「萬馬奔馳」相當類似嘅廣告，感到震驚且擔心。據佢講，震驚係想唔到同行會刊登如此相似嘅廣告，擔心日後會對集團品牌造成模糊化。佢又話個廣告由構思創作到出街，經歷半年時間，動用嘅資金逾千萬元，唔知點同股東交代。
利嘉閣董事總經理何紹章就話，因未收到律師信，所以𠵱家唔使回應住。
臨近年尾，地產行內頻頻有好消息。外資行第一太平戴維斯今年做咗唔少大額買賣，業績咁好，自然要同員工分享成果。
今年一如以往，前線營業員有花紅分之外，連後勤二百位同事亦有花紅獎賞，雖然重未知道有幾多，但都好過冇。
本港經濟啱啱有啲起色，希望人人有人工加，生機再現。
今年舖位買賣熾熱，旺區舖位最好賣，一啲二線區域商舖買賣金額都唔細，例如北角英皇道、電氣道，舖位成交總值近五億，但講到最好賣嘅地區，始終都離唔開九龍最熱鬧嘅旺角區。
華匯物業資料顯示，單係旺角彌敦道，促成嘅商舖買賣個案，涉及金額已近十億，總共做咗三十八宗成交，如果加埋同區花園街、亞皆老街，以至太子道西，交易金額更加高達十八億，佔整體六成四。至於深水埗嘅福華街、荔枝角道、順寧道同元州街，成交金額合共超過五億六，成績都唔錯。
蘭西
電郵地址：
